***

я баюся

баюся таго, што у іншых расцягвае рота куткі:

баюся атракцыёнаў, вялікіх натоўпаў на святы,

калі каляровы агонь паветра ірве на шматкі,

баюся піць самагонку замест гарбаты.

я баюся, што хтосьці падорыць табе мяне -

шкляную фігурку з шэрагу сотні такіх жа самых,

і кожная з іх па-свойму свой лёс кляне, каб

да цябе пераехаць з паліцаў жыцця сувенірнай крамы.

баюся, паставіш мяне пад акно, каб лепш бачыць усю наскрозь.

не страшна, калі разаб'юць мяне дзеці, гуляючы ў снежкі,

баюся, падумаеш, гэта табе здалось, і ўсміхнешся.

найбольш я баюся гэтай тваёй усмешкі.